Ulya Şeirlər 3-08-2017, 09:00

Həyat belə imiş demə

İlk baharın son günü,
qəmlə doluymuş,demə...
Sanki dünya boş qalıb,
sükut çöküb aləmə!...

Bir yaşıl ağac altda
dayanıbdı o,yalqız.
Həsrətiylə haraya
baxır o bəstəboy qız?..

Gözlərini zilləyib,
uzağa baxır bu an...
Axtarsa da, çox heyif,
görünmür qonşu oğlan!

Baxır-baxır,ah çəkir,
elə bil ki,dardadır!
Soruş,o ağac bilir,
qonşu oğlan hardadır...

Həyat belə olurmuş,
o,necə də pərişan...
Sevdiyindən,elə bil,
bu ağac qalıb nişan....

Sözünü geri aldın,
qaldın özün də yalqız...
O oğlanın yerini
qəlbində axtar,ay qız!...