Çində gecə görmə üçün kontakt linzalar HAZIRLANDI

Çində gecə görmə üçün kontakt linzalar hazırlanıb.

Loading.aZ xəbər verir ki, bu barədə "Daily Mail" yazır.

Çindən olan bir qrup alim insana əlavə avadanlıqdan istifadə etmədən qaranlıqda görmə imkanı verən innovativ kontakt linzalar hazırlayıb.

Qurğu kontakt linzanın nazik polimer təbəqəsinə daxil edilmiş xüsusi nanohissəciklər əsasında işləyir. Bu hissəciklər infraqırmızı şüaları udur və onu görünən işığa çevirir. Beləliklə, insan tam qaranlıqda belə infraqırmızı işığı yayan və ya əks etdirən obyektləri ayırd edə bilir.

Təcrübələr zamanı bu cür linzaları taxan könüllülər infraqırmızı diapazonda yanıb-sönən siqnalları görə, naxışları ayırd edə və zəif işıqlı şəraitdə naviqasiya edə bildilər. Həmçinin, infraqırmızı işığın qapalı göz qapaqlarından nüfuz etdiyi və test iştirakçılarına gözləri bağlı olsa belə, IR siqnallarını qəbul etməyə imkan verdiyi müşahidə edilib.

Hal-hazırda linzalar yalnız süni infraqırmızı işıq mənbələri ilə işləyir. Bununla belə, tədqiqatçılar cisimlərin və canlıların təbii istilik radiasiyasını dərk etməyə imkan yaratmaq üçün cihazın həssaslığını artırmaq üzərində işləməkdə davam edirlər.