Uşaqlar üçün ən zərərli oyuncaqlar: Gözə görünməyən təhlükə

Uşaqlar üçün oyuncaq deyildikdə, hər kəsin ağlına əyləncəli, yumşaq və maraqlı fiqurlar gəlir. Lakin bu rəngarəng və cazibədar məhsulların bəziləri, təəssüf ki, uşaqlar üçün ciddi sağlamlıq və psixoloji risklər daşıyır

Bəzi oyuncaqlar bahalı olsa da, bəziləri həddindən artıq ucuz olur. Bəs bunun səbəbləri nələrdir?

Loading.aZ araşdırmasında azyaşlılar üçün hazırlanan oyuncaqların görünməyən fəsadlarından bəhs edir. 

Kimyəvi maddələrlə zəngin “ucuz” oyuncaqlar

Bəzi plastik oyuncaqların tərkibində ftalatlar, qurğuşun və digər toksik maddələr olur. Bu maddələr dəridən və ya ağız yolu ilə keçərək uşağın hormonal və immun sisteminə zərər verə bilər. Xüsusilə ucuz və qeyri-sertifikatlı məhsullarda bu maddələrin miqdarı normadan artıq olur.

Kiçik hissəli oyuncaqlar

Balaca hissələrdən ibarət olan və ya asanlıqla parçalana bilən oyuncaqlar (məsələn, bəzi LEGO dəstləri, plastik fiqurlar) 3 yaşa qədər uşaqlar üçün son dərəcə təhlükəlidir. Buna görə də valideynlər oyuncaq alarkən, onun üzərində, yaxud etiketində qeyd olunan yaş həddinə diqqət etməlidirlər. Nəzərə almaq lazımdır ki, hər il yüzlərlə uşaq bu səbəbdən xəstəxanalara düşür.

Səsli və işıqlı oyuncaqlar

Həddindən artıq yüksək səs çıxaran və ya işıq yayan oyuncaqlar uşaqların eşitmə və görmə qabiliyyətinə zərər verə bilər. Xüsusilə bu tip oyuncaqlar eşitmə funksiyasında problemlər yarada bilir. Beyin hələ tam formalaşmadığı üçün yüksək səslər, həmçinin nevroloji narahatlıqlara da səbəb ola bilər.

Agressiyanı təşviq edən oyuncaqlar

Silah formalı, döyüşçü fiqurlu və qorxunc varlıqları simvolizə edən oyuncaqlar uşaqların psixoloji inkişafına mənfi təsir göstərir. Belə oyuncaqlar onlarda aqressiv davranışları normallaşdırır. Bilmək lazımdır ki, uşaqlar oyun zamanı öyrəndiklərini real həyatda tətbiq etməyə meyllidirlər.

“Ağıllı” oyuncaqlar yaxud texnoloji “tələ”

Planşet, uşaq üçün nəzərdə tutulmuş smartfon və digər rəqəmsal oyuncaqlar erkən yaşlardan ekrana bağlılıq yaradır. Bu cihazlar uşaqda diqqət pozuntusu, yuxu problemləri və asılılıq kimi nəticələr formalaşdırır. 

Təhlükəli fiziki dizayn: İti uclar və sərt materiallar

İti bucaqları, sərt və qırılan hissələri olan oyuncaqlar uşaqlarda ciddi fiziki xəsarətlərə səbəb ola bilər. Bu xüsusiyyətlər, adətən, keyfiyyətsiz istehsalda və ya təhlükəsizlik testindən keçməmiş məhsullarda olur. Oyuncağın keyfiyyətsiz plastiki və zəif yapışdırılmış hissələri asanlıqla qopa və uşaq üçün təhlükəyə çevrilə bilər.

Valideynlər, uşaq üçün oyuncaq seçərkən yalnız onun əyləncəli və ya populyar olmasına deyil, təhlükəsizlik göstəricilərinə də diqqət yetirməlidirlər. Oyuncağın üzərində CE, EN71 və digər beynəlxalq sertifikatların olması, onun müəyyən təhlükəsizlik standartlarına cavab verdiyini göstərir. Ən əsası isə, uşaq oyuncağından necə istifadə edəcəyini anlamalı və valideyn nəzarəti ilə oynamalıdır. Çünki bəzən görünüşcə zərərsiz olan bir oyuncaq, düzgün istifadə edilmədikdə təhlükəyə çevrilə bilər.