Kartofun həddindən artıq istehlakı bu xəstəlik riskini artıra bilər

Son elmi araşdırmalar kartofun, xüsusilə də qızardılmış və ya çox işlənmiş formada istehlakının 2 tip diabet riskini artırdığını ortaya çıxarır.

Kartof yüksək glisemik indeksə malik olduğuna görə qan şəkərini sürətlə qaldırır və bu da zamanla insulin müqavimətinə səbəb olur.

Kartof bişirildikdə və xüsusilə püre halına gətirildikdə onun karbohidratları daha tez parçalanır. Bu, qanda şəkərin kəskin yüksəlməsinə və mədəaltı vəzinin daha çox insulin ifraz etməsinə gətirib çıxarır. Uzun müddət davam edən bu vəziyyət 2 tip diabet riskini artırır.

Qızardılmış kartof isə həm yüksək karbohidrat, həm də çoxlu miqdarda yağ ehtiva etdiyi üçün riskləri ikiqat artırır. Araşdırmaya görə, tənzimlənməyən və tez-tez istehlak edilən qızardılmış kartof diabet və piylənmə riskini yüksəldən əsas qidalardan biri sayılır.

Kartofu tamamilə rasiondan çıxarmağa ehtiyac yoxdur. Onu suda qaynatmaq, qabıqlı şəkildə bişirmək və porsiyasını azaltmaq qan şəkərinə təsirinin qarşısını xeyli alır.