Motorola yeni cihazını təqdim etdi - Süni intellektlə işləyən ağıllı boyunbağı

Motorola şirkəti 2026 İstehlakçı Elektronikası Sərgisində (CES 2026) boyunbağı kimi dizayn edilmiş və Qira köməkçisi tərəfindən dəstəklənən qeyri-adi cihazını təqdim edib.

Heç bir ekran və ya fiziki düyməsi olmayan bu cihaz, qoşulmuş smartfon vasitəsilə obyektləri müəyyən edə, məlumatları ümumiləşdirə və əmrləri yerinə yetirə bilir.

İşıqlı mirvariyə bənzər görünüşü ilə cihaz, inkişaf etmiş sensorları və bulud əsaslı modelləri sayəsində ətrafındakıları görə və qavraya bilir.

Qira köməkçisi broşürdəki mətni oxuya və təhlil edə bilir və naviqasiyanı başlatmaq üçün avtomatik olaraq “Google” xəritələri aça bilir.

Motorola hələlik bu məhsulun texniki xüsusiyyətləri və qiyməti barədə ətraflı məlumat verməyib və hazırda onu texnoloji təcrübə kimi təqdim edir.

Şirkət, bu proses zamanı süni intellektlə işləyən cihazın real həyatda insanlarla necə qarşılıqlı əlaqədə olduğu barədə rəy toplayacaq.