Süleyman Rüstəm - Dəymə

Mən sənin dilinə dəymirəm, sən də

Gəl mənim bu ana dilimə dəymə.

Sənin də bağın var, gülün var, çəkin,

Bağımda əkdiyim gülümə dəymə.

Həsədlərlə baxdın çəmənimə sən,

Gör bir nələr etdin vətənimə sən.

Yan deyib, od vurdun bədənimə sən,

Altında atəş var, külümə dəymə.

Mən ağa-ağ dedim, qaraya-qara,

Sən məni istədin çəkəsən dara.

Təzəcə sağalır vurduğun yara,

Mənim bu yaralı könlümə dəymə!

Təbriz, 1942