Cabir Həsən(Ayrılıq sevginin anım günüdür)

Alınmadı bizdə sevgi nə edək,

Adını nə desən qoyaq, ayrılaq.

Ayrılıq sevginin anım günüdür,

Ağla, üzümüzü yuyaq, ayrılaq.

Səni sevə-sevə unudaram mən,

Adın da dilimə yovuşmaz daha.

Ömrün qatarından ayrı enənlər,

Göy yerə enərsə qovuşmaz daha.

Bu, sənə yazdığım sonuncu şeir,

Bu, səni andığım sonuncu andır.

Bir nakam sevginin son çırpınışı,

İndi hiss etdiyim son həyəcandır.