Süleyman Abdulla - Vaxtın şeiri

Qaralır qaş, sozalır göz, düşür şər,

Qaşın enən, gözün dolan vaxtı var.

Adamların ruh halıdır çiçəklər,

Qara yelin ləçək yolan vaxtı var.

Gecə aydır, gündüz gündür saçılan,

Bir söz varmı mərd adına qaçılan?

Al güllənin ağ alında açılan,

Qəbir üstə gülün solan vaxtı var.

Qəbri düşdü nə dərin ki vətənə,

Qan payıdır qədərinki vətənə.

Can borcudur əsgərinki vətənə,

Torpağın da vətən olan vaxtı var.