Qəfil ayağa qalxanda başınız niyə gicəllənir?

Qəfil ayağa qalxdıqda yaranan başgicəllənmə arterial təzyiq və qan dövranı ilə bağlı problemlərin əlaməti ola bilər.

Loading.az-ın xəbərinə görə, bu barədə kardioloq Aşiş Aqarval "The Times of India" nəşrinə müsahibəsində danışıb.

Həkim təhlükəli olan tarazlıq itirilməsinin əlamətlərini açıqlayıb.

Aşiş Aqarvalın sözlərinə görə, bədən mövqeyini dəyişərkən qan təzyiqinin kəskin düşməsi səbəbindən görmə bulanıqlaşa (gözdə qaralma) bilər: qan ayaqlara axır və beyində qısa müddətə oksigensiz qalır.

"Əgər qan axını bərpa olunmağa vaxt çatdırmırsa, o zaman insan tarazlığını itirdiyini hiss edə bilər", - deyə həkim qeyd edib.

Kardioloq vurğulayıb ki, susuzlaşma, yorğunluq, yuxusuzluq və qida qəbulları arasında uzun fasilələr bu cür vəziyyətlərin ehtimalını artırır, çünki orqanizmin dəyişikliklərə uyğunlaşma qabiliyyətini azaldır.

Aşiş Aqarval əlavə edib ki, qəfil ayağa qalxan zaman nadir başgicəllənmə epizodları adətən təhlükəli deyil. Lakin tez-tez baş verən hallar, xüsusən də huşunu itirmə, sinə narahatlığı və ya görmənin bulanıqlaşması kimi simptomlarla müşayiət olunarsa, tədbir görülməlidir.