Messi qeyri-adi ilklə idman tarixinə düşdü

“İnter Mayami” futbol klubunun rəhbərliyi yeni stadionunun tribunalarından birinə Lionel Messinin adını vermək qərarına gəlib.

Loading.aZın xəbərinə görə, bu, idman tarixində ilk haldır ki, hələ aktiv fəaliyyət göstərən futbolçu sağlığında belə bir şərəfə layiq görülür.

Klubun mətbuat xidmətinin məlumatına görə, “İnter Mayami”nin yeni stadionunun şərq tribunası argentinalı hücumçunun adını daşıyacaq. Floridada yerləşən klubun yeni arenasının açılışına isə cəmi bir həftə qalıb: açılışın aprelin 4-də keçirilməsi planlaşdırılır.

Messi 2023-cü ildən etibarən “İnter Mayami”nin (“çapellər”) heyətində çıxış edir və bu müddət ərzində dörd titul qazanıb. O, 2025-ci il MLS Kubokunun, 2024-cü il MLS müntəzəm mövsüm qalibinin kubokunun, 2025-ci il MLS Şərq Konfransı qalibinin kubokunun və 2023-cü il Liqalar Kubokunun sahibi olub.