Sobada kələm kotletləri - RESEPT

Kələm kotletləri həm büdcəyə uyğun, həm də sağlam yeməkdir. Bu resept həm vegetarianlar, həm də oruc tutanlar üçün ideal seçimdir.

Loading.aZ bu yemək reseptini təqdim edir:

İçərisi yumşaq və şirəli, üzəri isə iştahaaçan qızarmış qabıqlı olur. İstənilən qarnir ilə uyğun gəlir və ya sadəcə xama və ya sousla təqdim edilə bilər.

Tərkibi

Ağ kələm - 800 qram

Soğan - 1 ədəd

Yerkökü - 1 ədəd

Buğda unu - 3 xörək qaşığı

Suxarı (çörək qırıntısı) - 3 xörək qaşığı

Sarımsaq - 2 diş

Bitki yağı - 3 xörək qaşığı

Qara istiot (üyüdülmüş)

Duz

Hazırlanması

Kələmi orta ölçülü doğrayın. Üzərinə qaynar su töküb 5 dəqiqə bişirin, sonra suyunu süzün və soyumağa qoyun. Soğanı, yerkökünü və sarımsağı təmizləyib doğrayın. Tavada orta odda bitki yağı qızdırın, soğan və yerkökünü qızılı rəng alana qədər qovurun.

Kələmi, qovrulmuş tərəvəzləri və sarımsağı ətçəkən maşından keçirin və ya blenderdə xırdalayın. Alınan kütləni qaba tökün, üzərinə suxarı, un, duz və qara istiot əlavə edib yaxşı qarışdırın.

Soba listini perqament kağızı ilə örtün və yağlayın. Əllərinizi isladaraq kotlet forması verin və listə düzün. Əvvəlcədən 190°C-yə qədər qızdırılmış sobada 20–25 dəqiqə, qızılı rəng alana qədər bişirin.

Nuş olsun!