Bağışlayıram

Mənim bu yaşımda yoluma tikan

Düzən adamları bağışlayıram. 

Ölüm-itimli dünyadır, məni 

Üzən adamları bağışlayıram.

Mən bu adamlardan heç nə ummuram

Uman adamları bağışlayıram. 

Yaxşı adamların bir gülüşünə 

Yaman adamları bağışlayıram.

Dünəni bu günə nəzir demişdim

Bu günü sabaha bağışlayıram. 

Mənim kin saxlamaq həvəsim yoxdur 

Hamını Allaha bağışlayıram.

Sinəmə düşməyən ömür qurutdum

Tütün adamları bağışlayıram. 

Mən bircə özümü bağışlamıram 

Bütün adamları bağışlayıram.