İranın Xarici İşlər Nazirliyi: "İranın danışıqlar planı yoxdur və hücumlara "sərt" cavab verəcək"

Xarici İşlər Nazirliyinin sözçüsü İsmayıl Bəqayi çərşənbə günü İran mediasına bildirib ki, İran ABŞ-ın hücumlarına "sərt" cavab verməyə davam edəcək və danışıqlar aparmaq planı yoxdur.                                 Sun.Az                 

CNN-ə istinadən xəbər verir ki, İranın Televiziya Xəbərləri Şəbəkəsindən (SNN) əldə edilən videoya görə, Bəqayi Tehranda mərhum Ayətullah Əli Xameneinin kürəkəni üçün keçirilən anım mərasiminin qarşısında jurnalistlərə bildirib ki, "Hazırda danışıqlar üçün heç bir planımız yoxdur və ölkəni müdafiə etməyə diqqət yetiririk". Bəqayi bildirib ki, ABŞ "öhdəliklərini pozarsa", İran heç bir razılaşmaya əməl etməyəcək. "Bu, bir prinsipdir və biz ona əməl etməyə davam edəcəyik", - deyən Bəqayi əlavə edib ki, İran ABŞ-ın atəşkəsi başlanğıcdan bəri pozduğuna inanır.          

SNN sözçünün şərhlərini yaydıqdan qısa müddət sonra, yarı-rəsmi Mehr Xəbər Agentliyi ABŞ-ın Hörmüz boğazı yaxınlığındakı İranın Henqam adasına zərbə endirdiyini bildirdi. ABŞ Mərkəzi Komandanlığının sosial media paylaşımında bildirib ki, ABŞ ordusu çərşənbə günü İrana qarşı daha bir zərbə dalğasını tamamlayıb. Bu zərbələr Hörmüz boğazında gəmiləri hədəf almaq qabiliyyətini zəiflətmək məqsədi daşıyırdı və ABŞ-ın Tehrana qarşı ardıcıl beşinci hücum günüdür.

Müəllif: İlkin Məmmədkərimov