Bu səhər

📕 Məmməd Qədir - Bu səhər 

Gördüm ki, şam keçir, qoymuram sönə, 

Əsir dodaqlarım, döyülür sinə, 

Oyandım ürəyin döyüntüsünə,

Ağrıyam, harayam, küyəm bu səhər, -

Kimdi pəncərəmi döyən bu səhər? 

Döydükcə canıma ağrı gətirdi,

Yenə hicran əkdi, həsrət bitirdi, 

Sirdaşım gecəni qətlə yetirdi, 

Dərdli ürəyimə dəyən bu səhər, -

Kimdi pəncərəmi döyən bu səhər? 

Ürəyim kövrəkmiş, qəlb yuxa çıxdı, 

Baharı saraldı, yay yoxa çıxdı, 

Ulduzlar əridi, Ay yoxa çıxdı, 

Buludu ağlayan göyəm bu səhər, -

Kimdi pəncərəmi döyən bu səhər? 

Yağdı, quraq bəxtin doldu çalası,

Dağ dərdim göyərdi, açdı lalası, 

Allah axırını xeyrə calasın, 

Ümid çicəkləyir, göyəm bu səhər,

Kimdi pəncərəmi döyən bu səhər?